بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

زاھارلى! مۇنداي «تانىمالى» ويىنشىقتاردى بالاڭىزعا استە الىپ بەرمەڭىز

2021.05.11 15:02   كەلۋ قاينارى : حالىق تورابى



  ءبىر – ەكى جىلدان بەرى، «جالعان سۋ» دەگەن ويىنشىق ورتا، باستاۋىش مەكتەپ وقۋشىلارى اراسىندا جەدەل تارالا باستادى، مۇنداي ويىنشىق كوپتەگەن مەكتەپتەردىڭ ماڭىنداعى ساۋدا دۇكەندەرى مەن جازۋ جابدىقتارى دۇكەندەرىندە ساتىلادى. الايدا، ءتىلشىنىڭ تەكسەرۋ بارىسىندا بايقاۋىنشا، مۇنداي ويىنشىقتار دەنساۋلىققا كومەسكى حاۋىپ توندىرەدى.

  مەكتەپ اۋلاسىنىڭ ماڭىندا «جالعان سۋ» ويىنشىقتارى مولىنان ساتىلدى

  جازۋ جابدىقتارى دۇكەنىنەن قورابى ايگىلى سۋسىندىقتىڭ قورابىنا قاتتى ۇقسايتىن «جالعان سۋ» ويىنشىعىن ساتىپ الاتىن وقۋشىلار كوپ. «جالعان سۋ» ويىنشىعىنىڭ سىرتقى فورماسى كىشىرەيتىلگەن سۋسىندىق بوتەلكەسىنە ۇقسايدى، سىرتقى ءپىشىنى مەن رەڭى بازارداعى ايگىلى سۋسىندىقتاردىڭ قورابىنان اۋمايدى. ويىنشىقتىڭ ىشىندەگى سۇيىق زات ءمولدىر ءارى جارتىلاي ءمولدىر بولادى، ءار ءتۇرلى سۋسىندىقتاردىڭ رەڭىنە ۇقساتىلعان، بولىمسىز عانا حوش ءيىسى بار.

  ءتىلشىنىڭ بايقاۋىنشا، مۇنداي «جالعان سۋ» ويىنشىقتارىنىڭ باعاسى وتە ارزان، ەڭ قىمباتىنىڭ ءوزى 5 يۋاننان 10 يۋانعا دەيىن، ەڭ ارزاندارى ءبىر يۋان عانا. كەيبىر «جالعان سۋ» ويىنشىقتارىنىڭ بەلگىسىندە زاۆودتىڭ ينفورماتسيالارى جازىلماعان، تەك قاراپايىم عانا بەلگىگە «جالعان سۋ» نەمەسە كولا، جەمىس شىرىنى دەگەن سوزدەر عانا جازىلادى. ساتۋشىلاردىڭ ايتۋىنشا، مۇنداي ويىنشىق سۋعا ۇقسايدى، ءبىراق، سۋ ەمەس، قىزىقتى بولۋى ءۇشىن ءتۇرلى سۋسىندىقتاردىڭ قۇمىراسىنا ۇقساتىلىپ جاسالعان. ساتىپ الۋشىلاردىڭ بارلىعى بۇل نارسەنىڭ ويىنشىق ەكەنىن بىلەدى، ونى سۋسىندىق ورنىنا ىشپەيدى، ءونىمنىڭ ءوزى حاۋىپسىز ءارى قورشاعان ورتاعا زالالسىز.

  «جالعان سۋ» ويىنشىعى ولار ايتقانداي حاۋىپسىز ءارى قورشاعان ورتاعا زالالسىز ەمەس

  قۇرامىنداعى بور ەلەمەنتىنىڭ مولشەرى شەكتەن ارتىق، ادام دەنەسىنە زالالدى مۇنداي «جالعان سۋ» ويىنشىقتارى شىنىمەن دە «حاۋىپسىز ءارى قورشاعان ورتاعا زالالسىز» با؟ ءتىلشى 9 ءتۇرلى 14 دانا «جالعان سۋ» ويىنشىعىن ساتىپ الىپ، تەكسەرۋ قۇرىلىمدارىنىڭ حيميالىق جولمەن تەكسەرۋىنە بەرەدى. ۇلگى الىپ تەكسەرۋ ساندى مالىمەتىنە قاراعاندا، بۇل 14 «جالعان سۋ» ويىنشىعىنىڭ بارلىعىندا ەۆروپا وداعىنىڭ ويىنشىقتىڭ حاۋىپسىزدىگىنە قاتىستى شەكتەمەسىنەن ارتىق بور ەلەمەنتى بار بار ەكەنى بايقالعان، ەڭ كوپ بولعاندا شەكتەمەدەن 6 ەسە جوعارى بولعان.

  الايدا، ولشەمنەن ەڭ كوپ اسقان ءونىمدى ساۋدالاعان دۇكەن بۇل ونىمدەر ءىرى زاۆودتا وندىرىلگەن، بور قىشقىلدى ناتري قۇرامى جوق دەپ جاۋاپ بەرگەن. بۇل ءونىمنىڭ تەك تازا سۋ، كوپىرتكىش ۇنتاق، كراحمال، جابىستىرعىش قاتارلى 6 ءتۇرلى قۇرامى عانا بار دەپ جازىلعان، ادامعا مۇلدە حاۋىپسىز ءارى قورشاعان ورتاعا زالالسىز ءونىم دەگەن تۇسىنىك قالىپتاستىرادى.

  ولشەۋشى ينجەنەردىڭ تىلشىگە ايتۋىنشا، ورتا، باستاۋىش مەكتەپ وقۋشىلارى نەمەسە بالالار «جالعان سۋ» ويىنشىعىمەن ويناعان كەزدە، تەرىدەگى جاراقاتتارعا نەمەسە اۋىز بولىمىنە تيسە، بور قىشقىلدى ناتريدىڭ دەنەگە مولشەردەن ارتىق قابىلدانۋىن تۋدىرادى، ۋاقىت ۇزارا كەلە ۇزدىكسىز جينالىپ، دەنساۋلىققا جاسىرىن حاۋىپ توندىرەدى.

  بور قىشقىلدى ناتري قۇرامى بار ويىنشىقتاردىڭ زالالى زور

  حاۋىپسىزدىك ولشەمى جاعىندا شەكتەۋگە ءتيىستى مازمۇنداردى قوسۋ كەرەك

  شىنجىن قالالىق ويىنشىق كاسىبى بىرلەستىگىنىڭ باس حاتشىسى ليۋ يانفاڭ بىلاي دەپ تانىستىردى: «شاعىن شەبەرحانالاردىڭ بارلىعى نەگىزىنەن قاتىستى حيميالىق شيكىزاتتاردى سۋعا ارالاستىرىپ، وسىنداي ءونىم جاسايدى دا ءىستى تىندىم قىلادى». تەكسەرۋ قۇرىلىمىنىڭ ينجەنەرى جاڭ تيڭنىڭ تىلشىگە ايتۋىنشا، وندىرۋشىلەردىڭ «جالعان سۋ» ويىنشىعىنىڭ قۇرامىنا بور قىشقىلدى ناتريدى قوساتىن سەبەبى، بور قىشقىلدى ناتري سۋ تەكتەس زاتتاردىڭ اققىشتىعىن وزگەرتە الادى، «جالعان سۋ» ويىنشىعىنىڭ سەرپىمدىلىگىن، سوزىلعىشتىعىن ارتتىرادى، قولعا ۇستاعاندا جايلى سەزىنەتىندەي اسەر تۋدىرا الادى.

  مەملەكەتتىك بازاردى باقىلاۋ – باسقارۋ باس مەكەمەسى، مەملەكەتتىك ولشەمدەندىرىپ باسقارۋ كوميتەتى 2020 – جىلى 11 – ايدا «تۇتىنۋ بۇيىمدارىندا ءتۇيىندى حيميالىق زاتتاردى پايدالانۋدى تەجەۋ باعدارناماسىن» جاريالاپ، سۇيىق كۇيدەگى نەمەسە جابىسقاق ويىنشىقتاردىڭ ماتەريالدارىنداعى بور قۇرامىنىڭ زاتقا ءوتۋ مولشەرى ءار مىڭ گرامىنا 300 ميلليگرامنان اسپاۋى كەرەك دەگەن ۇسىنىس بەرگەن، الايدا، بۇل باعدارناما ماجبۇرلىك سيپاتقا يە ەمەس. قاتىستى ماماندار دەنساۋلىق حاۋىپسىزدىگىنە قاتەر توندىرەتىن بور قىشقىلدى ناتري زاتىنا قاتىستى، ويىنشىقتاردىڭ حاۋىپسىزدىك ولشەمىنىڭ قۇرامىنا شەكتەۋ مازمۇندارىن قوسۋ كەرەك، ولشەمىن جۇيەگە ءتۇسىرۋ جانە اكىمشىلىك جاقتان باسقارۋ ارقىلى قازىرگى وسى تەكتەس ويىنشىقتاردىڭ قۇرامىنداعى حاۋىپتى زاتتاردىڭ ارتىق بولۋى جاعدايىن وزگەرتۋ كەرەك دەپ ۇندەۋ تاستايدى.

  اتا – انالار بالاعا ويىنشىق ساتىپ العان كەزدە، حاۋىپسىزدىكتى باستى ورىنعا قويۋى كەرەك، قاتىستى تاراۋلاردىڭ باقىلاۋ – باسقارۋدى كۇشەيتىپ، بالالاردىڭ ويىنشىعىن ءوندىرۋ مەن ساتۋ ىستەرىن جۇيەگە ءتۇسىرۋىن ءۇمىت ەتەمىز.

  كەلۋ قاينارى: حالىق تورابى

جاۋاپتى رەداكتورى : نۇرعيسا قۇرمانجان ۇلى

 سۋرەت